ஆதிக்கவாதிகளின் வரிச் சுரண்டலுக்கு எதிரான அறச்சீற்றமிக்க அடையாளம் தீரன் சின்னமலை: அமைச்சர் உதயநிதி புகழாரம்

சுதந்திர போராட்ட வீரர் தீரன் சின்னமலையின் பிறந்தநாள் இன்று கொண்டாடப்படுகிறது. தமிழக முதல்வர் ஸ்டாலின், தமிழக எதிர்க்கட்சி தலைவர் எடப்பாடி பழனிச்சாமி, அரசியல் பிரமுகர்கள் பலர் அவரது படத்திற்கு மலர் மாலை அணிவித்து மரியாதை செலுத்தினர்.

இந்நிலையில், தேர்தல் பிரச்சாரத்தில் ஈடுபட்டு வரும் தமிழக விளையாட்டுத்துறை அமைச்சர் உதயநிதி ஸ்டாலின் தனது முகநூல் பக்கத்தில் தீரன் சின்னமலை பிறந்தநாளையொட்டி வாழ்த்து செய்தி ஒன்றை பகிர்ந்துள்ளார்.

அதில் அவர் கூறியிருப்பதாவது,

ஆதிக்கவாதிகளின் வரிச் சுரண்டலுக்கு எதிரான அறச்சீற்றமிக்க அடையாளம் தீரன் சின்னமலை அவர்களின் பிறந்த நாள் இன்று.

நாட்டைக் காக்க சாதி – மத எல்லைகளை கடந்து அன்றே பெரும்படையை ஒருங்கிணைத்த ஆகச்சிறந்த போராளியான அவரை என்றும் போற்றுவோம்!

ஓடாநிலையில் கோட்டை கட்டி ஆண்ட அவரது பிறந்தநாளில், ஜனநாயக வழியில் பாசிஸ்ட்டுகளை ஓட ஓட விரட்டிட உறுதியேற்போம்.

தீரன் சின்னமலையின் புகழ் ஓங்கட்டும் என தெரிவித்துள்ளார்.