கழிவுநீர் கால்வாய் அமைக்கும் பணியின்போது எரிவாயு வினியோக குழாயில் சேதம்

காஞ்சிபுரம்: சென்னை அருகே, காஞ்சிபுரம் மாவட்டம் பெரும்பாக்கம் பகுதியில் உள்ள குடியிருப்புகளுக்கு பூமிக்கு அடியில் குழாய் பதித்து திங்க் கியாஸ் நிறுவனம் இயற்கை எரிவாயு வினியோகம் செய்து வருகிறது.

பெரும்பாக்கம் நேசமணி நகரில் கிராம பஞ்சாயத்து சார்பில் கழிவு நீர் கால்வாய் அமைக்கும் பணிக்காக ஜேசிபி எந்திரம் மூலம் பள்ளம் தோண்டும் பணி நடைபெற்றுவந்துள்ளது. சம்பந்தப்பட்ட இடத்தில் பூமிக்கு அடியில் எரிவாயு குழாய் செல்வதால் அதற்கேற்றாற்போல் கால்வாய் அமைக்கும் பணியை மேற்கொள்ளமாறு திங்க் கியாஸ் நிறுவன ஊழியர்கள் தொழிலாளர்களுக்கு அறிவுறித்தியதாக கூறப்படுகிறது.

தொடர்ந்து கால்வாய் அமைக்கும் பணியில் தொழிலாளர்கள் ஈடுபட்டிருந்தபோது, எதிர்பாராதவிதமாக குழாயில் சேதம் ஏற்பட்டு எரிவாயு வெளியேறியுள்ளது. உடனடியாக எரிவாயு வினியோகம் தற்காலிகமாக நிறுத்தப்பட்டு, திங்க் கியாஸ் நிறுவனத்தின் ஊழியர்கள் சேதத்தை உடனடியாக சரி செய்து மீண்டும் எரிவாயு வினியோகம் சீர்படுத்தினர்.

இதுதொடர்பாக பெரும்பாக்கம் காவல்நிலையத்தில் திங்க் கியாஸ் நிறுவனம் சார்பில் புகார் அளிக்கப்பட்டுள்ளது.

மத்திய, மாநில அரசுகளின் ஆணைப்படி இந்தியா முழுவதும் பல்வேறு மாநிலங்களில் வீடு மற்றும் தொழிற்சாலை பயன்பாட்டிற்காக குழாய் மூலம் இயற்கை எரிவாயு வினியோகத்தை திங்க் கியாஸ் நிறுவனம் செய்து வருகிறது.

நடப்பு சட்டத்தின்படி ஐபிசி பிரிவு 285 மற்றும் 336-ன் கீழ், அனுமதி பெறாமல் மேற்கொள்ளப்படும் இதுபோன்ற பணிகளால் ஏற்படும் சேதங்களுக்கு 3 ஆண்டுகள் சிறை தண்டனை மற்றும் 25 கோடி ரூபாய் வரை அபராதம் விதிக்கப்படும். அரசு சட்டத்தின்படி, மூன்றாம் தரப்பினர் பள்ளம் தோண்டும் பணிகளைத் தொடங்க திட்டமிட்டால், அவர்கள் நகராட்சி அல்லது நகர எரிவாயு வினியோக நிறுவனத்திற்கு ‘தோண்டுவதற்கு முன் தொடர்பு கொள்ளுங்கள்’ என்னும் எண்ணிலும் திங்க் கியாஸ் (நிறுவனத்தின் கட்டணமில்லா எண். 1800-2022-999) மூலம் தெரிவிக்க வேண்டும்.

சட்டத்தை பின்பற்றுவதன் முக்கியத்துவத்தை வலியுறுத்தியும், இதுபோன்ற அலட்சியங்களைத் தவிர்ப்பதன் முக்கியத்துவத்தை வலியுறுத்தியும், மூன்றாம் தரப்பினரால் எதிர்காலத்தில் இதுபோன்ற நிகழ்வுகளைத் தடுக்க கடுமையான நடவடிக்கைகள் எடுக்க வேண்டும் என்பதை இந்த சம்பவம் மீண்டும் வலியுறுத்துகிறது என்று திங்க் கியாஸ் நிறுவனம் தெரிவித்துள்ளது.