வந்தே மாதரம் 150-வது ஆண்டு: SRM பல்கலையில் 3,032 பேர் பங்கேற்ற உலக சாதனை முயற்சி
காட்டாங்குளத்தூர்: நமது தேசியப் பாடலான “வந்தே மாதரம்” உருவானதின் 150-வது ஆண்டு நிறைவினை முன்னிட்டு, எஸ்.ஆர்.எம். அறிவியல் மற்றும் தொழில்நுட்ப கல்வி நிறுவனம் (SRMIST) சார்பில் பிரம்மாண்டமான உலக சாதனை முயற்சி இன்று வெற்றிகரமாக நடத்தப்பட்டது.
மாண்புமிகு பாரதப் பிரதமரின் தொலைநோக்கு பார்வைக்கும், SRMIST நிறுவனரும் வேந்தருமான டாக்டர் டி.ஆர். பாரிவேந்தர் அவர்களின் வழிகாட்டுதலுக்கும் இணங்க இந்த முயற்சி முன்னெடுக்கப்பட்டது.
இந்த நிகழ்வில், மாணவர்கள், பேராசிரியர்கள் மற்றும் நிர்வாக ஊழியர்கள் உள்ளிட்ட மொத்தம் 3,032 பேர் ஒன்றிணைந்து, “VANDE MATARAM” என்ற சொற்றொடரை மாபெரும் மனித உருவ அமைப்பாக வடிவமைத்தனர். நாட்டின் ஒற்றுமை மற்றும் தேசிய அடையாளத்தை வெளிப்படுத்தும் வகையில், பங்கேற்ற அனைவரும் தேசியக் கொடியின் மூன்று வண்ணங்களில் ஆடைகளை அணிந்திருந்தனர்.
இந்த உலக சாதனை முயற்சி World Record Union அமைப்பால் உறுதிப்படுத்தப்பட்டு, அதற்கான அதிகாரப்பூர்வ சாதனைச் சான்றிதழ் விரைவில் வழங்கப்படும் என தெரிவிக்கப்பட்டுள்ளது.
நிகழ்வில் உரையாற்றிய SRMIST பதிவாளர் டாக்டர் எஸ். பொன்னுசாமி, “இந்த உலக சாதனை முயற்சி SRMIST சமூகத்தின் கூட்டு முயற்சியையும், ஒற்றுமை உணர்வையும் பிரதிபலிக்கிறது. வந்தே மாதரம் பாடலின் 150 ஆண்டுகளை நினைவுகூரும் வகையில், மனித உருவ அமைப்பின் மூலம் அதன் சொற்றொடரை உருவாக்கியிருப்பது ஒழுக்கம், ஈடுபாடு மற்றும் கூட்டுப் பொறுப்பை வெளிப்படுத்துகிறது,”
என்று தெரிவித்தார்.
இதனைத் தொடர்ந்து பேசிய SRMIST தமிழ்ப் பேராயத் தலைவர் டாக்டர் கரு. நாகராசன், “வந்தே மாதரம் பாடல் இந்தியாவின் கலாச்சார மற்றும் மொழிப் பாரம்பரியத்தில் ஆழமாக வேரூன்றியுள்ளது. ஆயிரக்கணக்கான நபர்களின் ஒருமித்த பங்கேற்பின் மூலம், இந்த தேசபக்தி பாடலின் 150 ஆண்டுகால வரலாற்றுச் சிறப்பை கௌரவித்துள்ளோம்,”
என்று கூறினார்.
வந்தே மாதரம் பாடலின் இந்த முக்கிய மைல்கல் நிகழ்வின் மூலம், மாணவர்களிடையே தேசபக்தி மற்றும் சமூக ஈடுபாட்டை வளர்ப்பதில் தனது உறுதியை SRM பல்கலைக்கழகம் மீண்டும் வலியுறுத்தியுள்ளது.
