ஆறாவது சர்வதேச சைவ சித்தாந்த மாநாட்டின் நிறைவு விழாவில் மஹாராஷ்டிரா ஆளுநர் பங்கேற்பு

சென்னை: திருக்கயிலாயப் பரம்பரை தருமை ஆதீனம் அனைத்துலக சைவ சித்தாந்த ஆராய்ச்சி நிறுவனம் மற்றும் எஸ்.ஆர்.எம். பல்கலைக்கழகத்தின் தமிழ்ப்பேராயம் இணைந்து நடத்திய ஆறாவது அனைத்துலக சைவ சித்தாந்த மாநாடு, எஸ்.ஆர்.எம். அறிவியல் மற்றும் தொழில்நுட்பக் கல்லூரியில் வெகு விமரிசையாக நடைபெற்றது.

மூன்று நாட்கள் நடைபெற்ற இம்மாநாட்டில் ஆன்மிக மற்றும் கல்வி துறையை சேர்ந்தவர்கள், வெளிநாட்டினர் என பலர் பங்கேற்றனர்.

நிகழ்ச்சியின் இறுதி நாளில், தருமையாதீனம் 27-ஆவது குருமகாசந்திதானம் ஸ்ரீலஸ்ரீ கயிலை மாசிலாமணி தேசிக ஞானசம்பந்த பரமாச்சாரிய ஸ்வாமிகள், தர்மபுரம்; மகாராஷ்டிரா மாநில ஆளுநர் மாண்பமை சி.பி. இராதாகிருஷ்ணன், மலேசியா நாட்டை சேர்ந்த டான் ஸ்ரீ டத்தோ ஆர். நடராஜா, பேச்சாளர் பாரதி பாஸ்கர், எஸ்.ஆர்.எம் பல்கலை.யின் இணைவேந்தர் ரவி பச்சமுத்து, எஸ்.ஆர்.எம். தமிழ்ப்பேராயத்தின் தலைவர் கரு. நாகராசன், ஸ்ரீமத் மௌன திருஞானசம்பந்தத் தம்பிரான் ஸ்வாமிகள், மற்றும் மறை. வெற்றிவேல், மாநாட்டுப் பொறுப்பாளர், தருமையாதீனம், ஆகியோர் கலந்துகொண்டனர்.

எஸ்.ஆர்.எம். தமிழ்ப்பேராயத்தின் தலைவர் கரு. நாகராசன் பேசுகையில் “கடந்த பன்னிரண்டு ஆண்டுகளில், தமிழில் பூஜை செய்யக்கூடிய ஆயிரத்துக்கும் மேற்பட்ட அர்ச்சகர்களை உருவாக்கி, தமிழில் வழிபாடு நடைபெற வழிவகுத்துள்ளோம். இது தமிழ்ச் சமயத்திற்கு கிடைத்த ஒரு பெரும் வெற்றி. பக்தியை வளர்த்தால், பண்பாடும், ஒழுக்கமும், கருணையும் வளர்கின்றன. இளைஞர்களிடம் பக்தியும் நெறிகளும் பதியும்போதுதான் சமூக மாற்றம் நிகழும்” என்று கூறினார்.

பேச்சாளர், பாரதி பாஸ்கர் மேடையில் பேசும்போது “சைவ சித்தாந்தம் என்பது நூலில் இருக்கக்கூடிய ஞானம் மட்டும் இல்லை; நெஞ்சில் நிலைத்திருக்க வேண்டிய ஒழுக்க நெறி!” என்று தெரிவித்தார்.

“சைவ சித்தாந்த மாநாடு, நமது ஆன்மிக அறிவின் பகிர்வுக்கான முக்கியத் தளமாக இருக்கின்றது. இந்நிகழ்வு, சைவ சித்தாந்தத்தின் உண்மைகள் மற்றும் அதன் பரம்பரை தத்துவங்களை உலக அளவில் பரப்பி, ஒவ்வொரு மனிதனுக்கும் ஆன்மிக வளர்ச்சி மற்றும் அறிவு பெறும் வழியைக் காட்டுகின்றது.” என்று எஸ்.ஆர்.எம். இணைவேந்தர் ரவி பச்சமுத்து பேசினார்.

சைவசித்தாந்தத்தின் போதனைகளின் மூலம், உண்மையான அறிவு உள்ளிலிருந்து மலர்ந்துவிடுகிறது, அப்போது ஆன்மா, பற்றலும் ஆணவமும் இலங்கை, இறைவனின் திருவுருவுடன் ஒன்றாகிறது.” என்று தருமையாதீனம் 27-ஆவது குருமகாசந்திதானம் ஸ்ரீலஸ்ரீ கயிலை மாசிலாமணி தேசிக ஞானசம்பந்த பரமாச்சாரிய ஸ்வாமிகள் எடுத்துரைத்தார்.

நிகழ்ச்சியில் சிறப்பு விருந்தினராக பங்கேற்ற மகாராஷ்டிரா மாநில ஆளுநர் சி.பி. இராதாகிருஷ்ணன் பேசுகையில், “முன்னேற்றத்தின் பயணத்தில், நம்முடைய பண்டைய அறிவைக் கடைபிடிப்பதையே நாம் உண்மையான புதுமை என எண்ண வேண்டும். நாம் முன்னேறும் போதிலும், எங்கள் பூர்வீகங்களின் காலந்தாண்டிய கற்பனைகளைக் கௌரவிப்போம். அவற்றை கடந்த காலத்தின் கண்ணாடியாக மட்டும் பார்க்காமல், எதிர்காலத்தை உருவாக்குவதற்கு வழிகாட்டி என்று பார்த்துக்கொள்ள வேண்டும். எங்கள் பாரம்பரியம், நாம் இருந்ததை மட்டுமல்ல, நாம் என்ன ஆக முடியும் என்பதற்கான கட்டிடக்கல்.” என்று பேசினார்.