எஸ்.ஆர்.எம். பல்கலைக்கழகத்தில் ஐ.டி., சைபர் பாதுகாப்பு டிப்ளோமா: 350 அதிகாரி கேடெட்டுகள் பட்டம் பெற்றனர்

காட்டாங்குளத்தூர்: எஸ்.ஆர்.எம். பல்கலைக்கழகம் மற்றும் அதிகாரிகள் பயிற்சிக் கழகம் (சென்னை) இணைந்து நடத்திய தகவல் தொழில்நுட்பம் மற்றும் சைபர் பாதுகாப்பு டிப்ளோமா திட்டத்தின் முதல் கட்ட மாணவர்கள் இன்று பட்டம் பெற்றனர்.

ஒரு ஆண்டு காலம் கொண்ட இந்த டிப்ளோமா திட்டம், எதிர்கால இராணுவ அதிகாரிகளுக்கு தகவல் தொழில்நுட்பம், சைபர் பாதுகாப்பு மற்றும் தரவு பாதுகாப்பு தொடர்பான மேம்பட்ட அறிவு வழங்கும் நோக்கில் வடிவமைக்கப்பட்டது. நாட்டின் சைபர் பாதுகாப்புத் திறனை வலுப்படுத்துவதே இதன் பிரதான குறிக்கோளாகும்.

மொத்தம் 350 அதிகாரி கேடெட்டுகள் டிப்ளோமா பெற்றுள்ளனர். இவர்களில் 321 பேர் ஆண்களும், 29 பேர் பெண்களும் ஆவர். கல்விச் சிறப்பில் 16 பேர் தரவரிசை பெற்றுள்ளனர். கடுமையான இராணுவப் பயிற்சி அட்டவணையை கருத்தில் கொண்டு, கல்வித் தரத்தை பாதிக்காமல் இத்திட்டம் நெகிழ்வான முறையில் செயல்படுத்தப்பட்டதாக நிர்வாகம் தெரிவித்துள்ளது.

அதிகாரிகள் பயிற்சிக் கழகம் (சென்னை)யின் கமாண்டண்ட் லெப்டினன்ட் ஜெனரல் மைக்கேல் A.J. பெர்னாண்டஸ், இராணுவப் பயிற்சியுடன் தகவல் தொழில்நுட்பக் கல்வியை ஒருங்கிணைப்பது காலத்தின் தேவையாகும் என்று குறிப்பிட்டார்.

எஸ்.ஆர்.எம். பல்கலைக்கழகம் வேந்தர் பேராசிரியர் சி. முத்தமிழ்ச்செல்வன், இன்றைய பாதுகாப்புச் சவால்கள் டிஜிட்டல் துறையிலும் உருவாகி வருகின்றன; அவற்றை எதிர்கொள்ள இத்தகைய கல்வி முயற்சிகள் முக்கிய பங்காற்றும் என தெரிவித்தார்.

பதிவாளர் டாக்டர் எஸ். பொன்னுசாமி, துணைவேந்தர் (அறிவியல் மற்றும் மனிதவியல், மேலாண்மை, சட்டம்) பேராசிரியர் ஏ. வினய் குமார் உள்ளிட்டோர் மற்றும் அதிகாரிகள் பயிற்சிக் கழகத்தின் மூத்த அதிகாரிகள், டிப்ளோமா நிறைவு செய்த கேடெட்டுகள் இந்நிகழ்வில் கலந்துகொண்டனர்.

தேசிய திறன் மேம்பாட்டில் பங்களிக்கும் முக்கியமான கல்வி முயற்சியாக இந்த இணைப்பு திட்டம் பார்க்கப்படுகிறது.