காவேரி மருத்துவமனையின் உலக சாதனை: இரு இதய வால்வுகளுக்கு அறுவை சிகிச்சை இன்றி கதீட்டர் மூலம் வெற்றிகர சிகிச்சை

சென்னை: ஆழ்வார்பேட்டையில் உள்ள காவேரி மருத்துவமனை, பழுதடைந்த இரண்டு இதய வால்வுகளுக்கு மீண்டும் திறந்தநிலை இதய அறுவை சிகிச்சை மேற்கொள்ளாமல், முழுமையாக கதீட்டர் (Catheter) வழியாக சிகிச்சை அளித்து உலகளவில் புதிய மருத்துவச் சாதனையைப் படைத்துள்ளது.

கடந்த 25 ஆண்டுகளுக்கு முன்பு ‘ராஸ்’ (Ross Procedure) இதய வால்வு அறுவை சிகிச்சை செய்து கொண்டிருந்த 58 வயது நோயாளிக்கு, தற்போது ஏற்பட்டிருந்த பெருந்தமனி (Aortic) மற்றும் நுரையீரல் தமனி (Pulmonary) வால்வுகளின் கடுமையான பாதிப்புகளுக்கு இந்த நவீன சிகிச்சை வெற்றிகரமாக மேற்கொள்ளப்பட்டது.

உலகிலேயே முதல் “Post Ross Double Valve Rescue”

மருத்துவ நிபுணர்களின் தகவலின்படி, ராஸ் அறுவை சிகிச்சைக்குப் பிறகு பழுதடைந்த இரண்டு இதய வால்வுகளையும் முழுமையாக கதீட்டர் வழியாக மாற்றிய உலகின் முதல் “Post Ross Double Valve Rescue” சிகிச்சை இதுவாக கருதப்படுகிறது.

மிக ஆபத்தான நிலையில் இருந்த நோயாளி

58 வயதான நோயாளி கடுமையான இதய செயலிழப்பு, பெருந்தமனி வால்வு பின்னொழுக்கு, நுரையீரல் தமனி வால்வு பாதிப்பு, நுரையீரல் உயர் ரத்த அழுத்தம் உள்ளிட்ட பல்வேறு சிக்கல்களால் அவதிப்பட்டு வந்தார்.

இதன் காரணமாக கால்கள் மற்றும் வயிற்றில் கடுமையான வீக்கம், மூச்சுத்திணறல், சிறுநீரகம் மற்றும் கல்லீரல் செயல்பாட்டில் பாதிப்பு போன்ற பிரச்சினைகள் ஏற்பட்டிருந்தன. மேலும், நியூயார்க் ஹார்ட் அசோசியேஷன் (NYHA) அளவுகோலின்படி, அவர் III-IV என்ற மிக மோசமான இதய செயலிழப்பு நிலையில் இருந்தார்.

பல மருத்துவமனைகளை அணுகியபோதும், இரண்டாவது முறையாக திறந்தநிலை இதய அறுவை சிகிச்சை மேற்கொள்வது மிகவும் ஆபத்தானது என்பதால் சிகிச்சை வழங்க முடியாது என்று தெரிவிக்கப்பட்டிருந்தது.

AI உதவியுடன் நவீன சிகிச்சை

காவேரி ஹார்ட் இன்ஸ்டிடியூட்டின் இதய நிபுணர்கள் குழு, முப்பரிமாண எக்கோ கார்டியோகிராபி மற்றும் கார்டியாக் CT ஸ்கேன் மூலம் நோயாளியின் நிலையை விரிவாக ஆய்வு செய்தது.

பின்னர், செயற்கை நுண்ணறிவு (AI) தொழில்நுட்பத்தின் உதவியுடன் ‘Virtual Valve Implant’ கணிப்பு மாதிரிகளை பயன்படுத்தி சிகிச்சை திட்டமிடப்பட்டது.

முதலில் பல்மனரி வால்வில் Medtronic Melody Transcatheter Pulmonary Valve பொருத்தப்பட்டு, பின்னர் பழுதடைந்த அயோர்டிக் வால்வில் Edwards SAPIEN 3 Ultra Resilia Balloon Expandable Valve வெற்றிகரமாக பொருத்தப்பட்டது.

இந்த முழு சிகிச்சையும் ஹைபிரிட் கேத் லேபில், முழு மயக்க மருந்தின் கீழ், மார்பைத் திறக்காமல் கதீட்டர் வழியாகவே மேற்கொள்ளப்பட்டது.

இரண்டு வாரங்களில் இயல்பு வாழ்க்கைக்கு திரும்பிய நோயாளி

சிகிச்சைக்குப் பிறகு சில நாட்கள் மட்டுமே தீவிர சிகிச்சைப் பிரிவில் இருந்த நோயாளி எந்தவித சிக்கலும் இல்லாமல் குணமடைந்து வீடு திரும்பினார்.

இரண்டு வாரங்களுக்குப் பிறகு மேற்கொள்ளப்பட்ட பரிசோதனையில் உடல்நிலை கணிசமாக மேம்பட்டிருந்தது. உடல் வீக்கம் முழுமையாக குறைந்து, NYHA Class I என்ற இயல்பு நிலைக்கு திரும்பியிருந்தார். தற்போது அவர் சிரமமின்றி உறங்குவதுடன், தினமும் 20 முதல் 30 நிமிடங்கள் வரை நடைப்பயிற்சி மேற்கொள்ளும் அளவுக்கு உடல்நலம் மேம்பட்டுள்ளது.

மருத்துவர்கள் என்ன கூறுகிறார்கள்?

காவேரி ஹார்ட் இன்ஸ்டிடியூட்டின் ட்ரான்ஸ்கதீட்டர் ஹார்ட் வால்வ் தெரபிஸ் இயக்குநர் டாக்டர் ராஜாராம் அனந்தராமன் கூறுகையில்,

“ராஸ் அறுவை சிகிச்சைக்குப் பிறகு இரண்டு வால்வுகளும் பழுதடைந்தால் மீண்டும் திறந்தநிலை அறுவை சிகிச்சை செய்வது மிகுந்த ஆபத்தானது. துல்லியமான ஸ்கேனிங், நுணுக்கமான திட்டமிடல் மற்றும் பல்துறை மருத்துவ நிபுணர்களின் ஒருங்கிணைந்த முயற்சியால், மார்பைத் திறக்காமல் கதீட்டர் வழியாக இரண்டு வால்வுகளையும் வெற்றிகரமாக மாற்ற முடிந்தது. எங்கள் அறிவுக்கு எட்டியவரை, உலக மருத்துவ வரலாற்றில் முழுமையாக கதீட்டர் மூலம் மேற்கொள்ளப்பட்ட முதல் ‘டபுள் ட்ரான்ஸ்கதீட்டர் ராஸ் ரெஸ்க்யூ’ சிகிச்சை இதுவாகும்,” என்றார்.

காவேரி மருத்துவமனைகள் குழுமத்தின் இணை நிறுவனரும் செயல் இயக்குநருமான டாக்டர் அரவிந்தன் செல்வராஜ் கூறுகையில்,

“சிக்கலான இதய வால்வு நோய்களுக்கு அதிநவீன கட்டமைப்பு சார்ந்த சிகிச்சைகள் புதிய நம்பிக்கையை உருவாக்கி வருகின்றன. அனுபவமிக்க மருத்துவக் குழு, ஹைபிரிட் அறுவை சிகிச்சை அரங்கு, மேம்பட்ட ஸ்கேனிங் வசதிகள் மற்றும் பல்துறை ஒருங்கிணைப்பு ஆகியவை இணைந்ததால்தான் இந்த உலகச் சாதனை சாத்தியமானது. இந்திய நோயாளிகளுக்கு உலகத் தரத்திலான மருத்துவச் சேவைகளை வழங்குவதற்கான எங்களது அர்ப்பணிப்பை இந்த வெற்றி வெளிப்படுத்துகிறது,” என்றார்.