கார்கில் விஜய் திவாஸ் 2026: ஷௌர்யா விஜய் யாத்திரையை பாதுகாப்பு அமைச்சர் ராஜ்நாத் சிங் தொடங்கி வைத்தார்

புதுடெல்லி: 2026-ஆம் ஆண்டு கார்கில் விஜய் திவாஸை முன்னிட்டு, இந்திய வீரர்களின் தியாகம் மற்றும் வீரத்தை நினைவுகூரும் வகையில், ‘ஷௌர்யா விஜய் யாத்திரை 2026’யை பாதுகாப்பு அமைச்சர் ராஜ்நாத் சிங் புதுடெல்லியில் உள்ள தேசிய போர் நினைவிடத்தில் இருந்து கொடியசைத்து தொடங்கி வைத்தார்.

ஜாவா மற்றும் யெஸ்டி மோட்டார்சைக்கிள்களில் நடைபெறும் இந்த 13 நாள் யாத்திரையில், பணியில் உள்ள மற்றும் ஓய்வுபெற்ற ராணுவ வீரர்கள், வீரமரணம் அடைந்த ராணுவ வீரர்களின் குடும்பத்தினர் உள்ளிட்ட 28 பேர் பங்கேற்கின்றனர். சுமார் 1,900 கிலோமீட்டர் தூரம் பயணிக்கும் இந்தக் குழு, லடாக்கின் டிராஸ் பகுதியில் அமைந்துள்ள கார்கில் போர் நினைவிடத்தை ஜூலை 26-ஆம் தேதி சென்றடையவுள்ளது.

“ஒரே பயணம், ஒரே தேசம், ஒரே வணக்கம்” என்ற முழக்கத்துடன் நடைபெறும் இந்த யாத்திரை, 1999-ஆம் ஆண்டு கார்கில் போரில் இந்திய வீரர்கள் வெளிப்படுத்திய வீரத்தையும், தியாகத்தையும் நினைவுகூரும் நிகழ்வாக அமைந்துள்ளது.

இந்தப் பயணம் சண்டிமந்திர், ரெசாங் லா மற்றும் லே போர் நினைவிடங்கள் வழியாகச் செல்லும். தேசிய போர் நினைவிடத்தில் இருந்து புனித மண்ணை கார்கில் போர் நினைவிடத்திற்கு எடுத்துச் செல்வதுடன், வீர நாரிகளின் தியாகத்திற்கும் மரியாதை செலுத்தும் நிகழ்வுகளும் இதில் இடம்பெறுகின்றன.

தொடக்க நிகழ்ச்சியில், பாதுகாப்பு அமைச்சர் ராஜ்நாத் சிங், முப்படைகளின் தலைமைத் தளபதி ஜெனரல் என்.எஸ். ராஜா சுப்ரமணி, ராணுவத் தலைமைத் தளபதி ஜெனரல் தீரஜ் சேத், மூத்த ராணுவ அதிகாரிகள், முன்னாள் ராணுவ வீரர்கள் மற்றும் தேசிய மாணவர் படை (NCC) மாணவர்கள் கலந்து கொண்டனர்.

நிகழ்ச்சியில் பேசிய ராஜ்நாத் சிங், கார்கில் போரில் இந்தியாவின் வெற்றியை நாட்டின் இறையாண்மை மற்றும் தேசிய மரியாதையை பாதுகாத்த வரலாற்றுச் சாதனையாகக் குறிப்பிட்டார். மேலும், கேப்டன் விக்ரம் பத்ரா, லெப்டினன்ட் மனோஜ் குமார் பாண்டே, சுபேதார் மேஜர் (கௌரவ கேப்டன்) யோகேந்திர சிங் யாதவ் (ஓய்வு) மற்றும் சுபேதார் மேஜர் (கௌரவ கேப்டன்) சஞ்சய் குமார் (ஓய்வு) உள்ளிட்ட பரம் வீர் சக்ரா விருது பெற்ற வீரர்களின் பங்களிப்பை நினைவுகூர்ந்தார்.

இந்த அஞ்சலிப் பயணத்தை ஜாவா யெஸ்டி மோட்டார்சைக்கிள்ஸ் நிறுவனம், இந்திய ஆயுதப்படைகளுடன் இணைந்து 2021-ஆம் ஆண்டு தொடங்கியது. இந்திய ராணுவ வீரர்களின் வீரத்தையும், அவர்களின் சேவையையும் இளம் தலைமுறையினருக்கும் மோட்டார்சைக்கிள் சமூகத்தினருக்கும் எடுத்துச் செல்லும் நோக்கில் ஆண்டுதோறும் இந்த யாத்திரை நடத்தப்பட்டு வருகிறது.

இந்த ஆண்டு யாத்திரையில் Jawa 350, Jawa 42, Jawa 42 FJ, Yezdi Adventure மற்றும் Yezdi Scrambler மோட்டார்சைக்கிள்கள் பயன்படுத்தப்படுகின்றன.

கிளாசிக் லெஜெண்ட்ஸ் நிறுவனத்தின் இணை நிறுவனர் அனுபம் தரேஜா கூறுகையில், கார்கில் போரில் உயிர்நீத்த வீரர்களின் தியாகத்தையும், அவர்களின் குடும்பங்களின் அர்ப்பணிப்பையும் புதிய தலைமுறையினர் அறிந்து கொள்ளச் செய்வதே இந்த யாத்திரையின் முக்கிய நோக்கம் என்று தெரிவித்தார்.

ஜூலை 26-ஆம் தேதி கார்கில் போர் நினைவிடத்தில் நடைபெறும் கார்கில் விஜய் திவாஸ் நிகழ்வுடன் ஷௌர்யா விஜய் யாத்திரை 2026 நிறைவடையும்.