அஜித் பிறந்தநாளுக்கு ரீ-ரிலீஸ் செய்யப்படும் பில்லா

வருகின்ற மே 1-ஆம் தேதி நடிகர் அஜித்குமார் தனது 52 ஆவது பிறந்தநாளினை கொண்டாடுகிறார். அவரது ரசிகர்களும் அதனை கொண்டாடும் விதமாக மே 1-ஆம் தேதியன்று அவரின் சூப்பர் டூப்பர் படமான பில்லா ரீ-ரிலீஸ் செய்யப்படுகிறது.

தமிழகம் முழுவதும் சுமார் 150 தியேட்டர்களில் படம் ரிலீஸ் செய்யப்படும் என்று திட்டமிடப்பட்டுள்ளது.

ரசிகர்களின் ஏகோபித்த ஆதரவினால், எதிர்பார்ப்பினாலும் ஏற்கனவே 2021 மார்ச் மாதம் இத்திரைப்படம் ரீ-ரிலீஸ் செய்யப்பட்டிருந்தது.

பில்லா திரைப்படத்தின் ஒரிஜினல் வெர்சன் 1980 ஆம் ஆண்டு சூப்பர் ஸ்டார் ரஜினிகாந்த் நடிப்பில் வெளியானது. இயக்குனர் ஆர்.கிருஷ்ணமூர்த்தி இயக்கத்தில் ரஜினிகாந்த், ஸ்ரீபிரியா, பாலாஜி, மேஜர் சுந்தர்ராஜன் ஆகியோர் முக்கிய வேடங்களில் நடித்திருந்தனர். 1978ஆம் ஆண்டு வெளியிடப்பட்ட ஹிந்தித் திரைப்படமான டான் எனும் திரைப்படத்தைத் தழுவியே இந்தத் திரைப்படம் எடுக்கப்பட்டது. ஆயினும் திரைக்கதையில் தமிழ்த் திரைப்பட இரசிகர்களுக்கு ஏற்றவகையில் சில மாற்றங்கள் செய்யப்பட்டிருந்தன.

அதனை தழுவியே, காலமாற்றத்திற்கேற்ப சண்டை காட்சிகளில் பல புதுமைகளை புகுத்தி படமாக்கியிருந்தார் இயக்குனர் விஷ்ணுவர்தன்.

இசை சக்கரவர்த்தி எம்.எஸ். விஸ்வநாதன் இசையமைத்த my name is billa, வெத்தலையை போட்டேண்டி ஆகிய பாடல்களை கச்சிதமாக ரீமேக் செய்தார் யுவன் ஷங்கர் ராஜா.

அஜித்தின் பில்லா திரைப்படத்தில் நடிகைகள் நயன்தாரா, நமிதா, நடிகர் பிரபு ஆகியோர் முக்கிய கதாபாத்திரங்களில் நடித்துள்ளனர்.

கடந்த சில நாட்களுக்கு முன்னர் விஜய் ரசிகர்களை மகிழ்விக்கும் விதமாக அவரின் சூப்பர்ஹிட் படமான கில்லி வெளியாகி திரையரங்குகளில் சக்கைபோடு போட்டு கொண்டிருக்கும் நிலையில், அஜித் ரசிகர்களுக்காக பில்லா வெளியாகவுள்ளது.

அதேபோல் அஜித்திற்கு “தல” என்று பெயர் வர காரணமான மெகாஹிட் படமான “தீனா” திரைப்படமும் வெளியிடப்படலாம் என்று கூறப்படுகிறது.

சமீப காலங்களில் வெளியான புதிய திரைப்படங்கள் மக்களிடம் போதிய வரவேற்பு பெறாத நிலையில், வெற்றிபெற்ற பழைய திரைப்படங்கள் வெளியிடப்படுவதாக திரையுலகத்தில் பேசப்படுகிறது.