ஸ்விக்கி ‘நாளைக்கான பெண் தலைவர்கள்’ பட்டியலில் CIT மாணவிகள் இந்துஜா, பிளெஸ்ஸி தேர்வு
சென்னை: இந்தியாவின் முன்னணி ஆன்டிமாண்ட் சேவை தளமான Swiggy, சர்வதேச மகளிர் தினத்தை முன்னிட்டு தொடங்கிய “நாளைக்கான பெண் தலைவர்கள்” (Women Leaders of Tomorrow) பட்டியலில், Chennai Institute of Technology மாணவிகளான இந்துஜா பி மற்றும் பிளெஸ்ஸி ஜெபபுஷ்பம் பி ஆகியோரைத் தேர்வு செய்து சிறப்பித்துள்ளது.
நாடு முழுவதும் இருந்து 800-க்கும் மேற்பட்ட விண்ணப்பங்களில் இருந்து தேர்ந்தெடுக்கப்பட்ட 13 இளம் பெண்களில் இவர்களும் இடம்பிடித்துள்ளனர். நிஜ உலக பிரச்சனைகளுக்கு தீர்வு காணும் புதுமைகள் மற்றும் சமூகத் தாக்கம் ஆகியவற்றின் அடிப்படையில் இந்த அங்கீகாரம் வழங்கப்பட்டுள்ளது.
இந்துஜா பி, பக்கவாதம், தண்டுவடக் காயங்கள் மற்றும் நரம்புத்தசை கோளாறுகளால் பாதிக்கப்பட்டவர்களுக்கு உதவும் வகையில் “Grasp Ease” எனும் குறைந்த விலை மணிக்கட்டு மற்றும் கைக்கான சீரமைப்புக் கருவியை உருவாக்கியுள்ளார். Smart India Hackathon 2025-இல் தனது குழுவை வெற்றிக்கு வழிநடத்திய அவர், ESP32 மைக்ரோகண்ட்ரோலர் அடிப்படையில் ஜாய்ஸ்டிக், மொபைல் செயலி மற்றும் குரல் கட்டளைகள் மூலம் இயக்கக்கூடிய வசதிகளை இந்த கருவியில் ஒருங்கிணைத்துள்ளார். இது உடல் இயக்கக் குறைபாடுகள் உள்ளவர்களுக்கு தன்னம்பிக்கை மற்றும் சுயநிறைவை மேம்படுத்த உதவுகிறது.
மற்றொரு மாணவியான பிளெஸ்ஸி ஜெபபுஷ்பம் பி, சுற்றுச்சூழல் நிலைத்தன்மையை மையமாகக் கொண்ட “Novach Tech Solutions” என்ற புத்தொழில் நிறுவனத்தை நிறுவியுள்ளார். மேம்பட்ட ஆக்சிஜனேற்ற செயல்முறை (AOP) தொழில்நுட்பத்தைப் பயன்படுத்தி மலிவு விலையில் கழிவுநீர் சுத்திகரிப்பு அமைப்புகளை உருவாக்கும் இவரது நிறுவனம், ₹3 லட்சம் மதிப்பிலான புத்தாக்க வவுச்சர் மானியத்தையும் பெற்றுள்ளது.
அகில இந்திய மகளிர் புத்தொழில் தொடக்க விழாவில் (AIWS), 5,000 பெண்கள் தலைமையிலான நிறுவனங்களில் மாணவர் பிரிவில் வெற்றி பெற்ற ஒரே நிறுவனம் இவரது நிறுவனமாகும்.
மேலும், ISRO உடன் இணைந்து ULOG3 கியூப்சாட் திட்டத்தில் பங்கேற்றதுடன், ரோபோடிக்ஸ், ஆட்டோமேஷன் மற்றும் தகவல் தொடர்பு துறைகளில் பல புதுமைகளுக்கும் இவர் தலைமை தாங்கியுள்ளார்.
ஸ்விக்கியின் இந்த “நாளைக்கான பெண் தலைவர்கள்” முயற்சி, இளம் பெண்களின் சாதனைகள் மற்றும் சமூக மாற்றத்திற்கான அவர்களின் பங்களிப்புகளை முன்னிறுத்துவதை நோக்கமாகக் கொண்டது. தேர்வு செய்யப்பட்ட பெண்களின் பயணங்கள் ஸ்விக்கி செயலியில் வெளியிடப்பட்டுள்ளன.
