ஆந்திரப் பிரதேசத்தில் ரூ.3,200 கோடிக்கும் அதிக முதலீடு: திருப்பதியில் உலகளாவிய உதிரிபாகங்கள் மையத்தை அமைக்கும் ஹீரோ மோட்டோகார்ப்

திருப்பதி: உலகின் மிகப்பெரிய இருசக்கர வாகன உற்பத்தியாளர்களில் ஒன்றான ஹீரோ மோட்டோகார்ப், ஆந்திரப் பிரதேசத்தில் ரூ.3,200 கோடிக்கும் அதிகமான முதலீட்டை மேற்கொள்ள இருப்பதாக அறிவித்துள்ளது.

இதன் ஒரு பகுதியாக, திருப்பதியில் ரூ.750 கோடிக்கும் அதிக முதலீட்டில் இரண்டாவது உலகளாவிய உதிரிபாகங்கள் மையத்திற்கான (Global Parts Centre) அடிக்கல் நாட்டப்பட்டது.

இந்த புதிய முதலீட்டின் மூலம், திருப்பதியை உலகத் தரம் வாய்ந்த உற்பத்தி மற்றும் மின்சார வாகன (EV) மையமாக உருவாக்குவதுடன், ஹீரோ மோட்டோகார்பின் உலகளாவிய விநியோகச் சங்கிலியை மேலும் வலுப்படுத்துவதே நிறுவனத்தின் நோக்கமாகும். அடிக்கல் நாட்டு விழாவில் ஆந்திரப் பிரதேச முதலமைச்சர் என். சந்திரபாபு நாயுடு மற்றும் ஹீரோ மோட்டோகார்ப் செயல் தலைவர் டாக்டர் பவன் முஞ்சல் உள்ளிட்டோர் பங்கேற்றனர்.

முதலமைச்சர் சந்திரபாபு நாயுடு பேசுகையில், ஆந்திரப் பிரதேசத்தின் தொழில் வளர்ச்சியில் ஹீரோ மோட்டோகார்ப் நீண்டகால பங்காளியாக இருந்து வருவதாகவும், திருப்பதியில் உலகளாவிய உதிரிபாகங்கள் மையத்தை அமைக்கும் முடிவு மாநிலத்தின் முதலீட்டாளர் நட்பு கொள்கைகளுக்கும், உலகத் தரம் வாய்ந்த உள்கட்டமைப்புக்கும் கிடைத்த அங்கீகாரம் என்றும் தெரிவித்தார்.

மேலும், இந்த முதலீடு ராயலசீமா பிராந்தியத்தில் ஆயிரக்கணக்கான வேலைவாய்ப்புகளை உருவாக்குவதுடன், உள்ளூர் விநியோகச் சங்கிலியை வலுப்படுத்தி, பொருளாதார வளர்ச்சிக்கு புதிய வேகத்தை அளிக்கும் என்றும் அவர் கூறினார்.

ஹீரோ மோட்டோகார்ப் நிறுவனத்தின் செயல் தலைவர் டாக்டர் பவன் முஞ்சல் கூறுகையில், “வணிக வளர்ச்சியும் தேச நிர்மாணமும் ஒன்றோடொன்று இணைந்தவை என்ற நம்பிக்கையுடன் ஹீரோ மோட்டோகார்ப் செயல்பட்டு வருகிறது.

திருப்பதியில் அமைக்கப்படும் இந்த உலகளாவிய உதிரிபாகங்கள் மையம், இந்தியாவின் எதிர்கால உற்பத்தி மற்றும் மின்சார வாகன வளர்ச்சியில் முக்கிய பங்காற்றும்.

இது எங்களின் உலகளாவிய விநியோகச் சங்கிலியை வலுப்படுத்துவதுடன், ‘இந்தியாவில் தயாரித்து உலகிற்கு வழங்குதல்’ என்ற இலக்கையும் மேலும் உறுதிப்படுத்தும்” என்றார்.

மேலும், நிறுவனத்தின் நிறுவனர் மற்றும் கௌரவத் தலைவர் டாக்டர் பிரிஜ்மோகன் லால் முஞ்சாலின் 103-வது பிறந்தநாளில் இந்த முக்கிய திட்டத்தைத் தொடங்குவது மிகவும் சிறப்பான தருணம் என்றும் அவர் குறிப்பிட்டார்.

உற்பத்தித் திறன் அதிகரிப்புதிருப்பதியில் அமையவுள்ள உலகளாவிய உதிரிபாகங்கள் மையம், ஹீரோ மோட்டோகார்பின் இந்தியா மற்றும் சர்வதேச சந்தைகளுக்கான உதிரிபாக விநியோகத்தின் முக்கிய மையமாக செயல்படும்.

மேலும், நிறுவனத்தின் மின்சார வாகனங்கள் முழுமையாக திருப்பதி ஆலையிலேயே வடிவமைக்கப்பட்டு உற்பத்தி செய்யப்படுகின்றன.

இந்த முதலீட்டின் மூலம், ஆலையின் ஆண்டு உற்பத்தித் திறன் 1.2 மில்லியன் அலகுகளில் இருந்து 1.5 மில்லியன் அலகுகளாக உயர்த்தப்பட உள்ளது.

4,000 புதிய வேலைவாய்ப்புகள் இந்த விரிவாக்கத் திட்டத்தின் மூலம் சுமார் 4,000 பேருக்கு நேரடி மற்றும் மறைமுக வேலைவாய்ப்புகள் உருவாகும் என எதிர்பார்க்கப்படுகிறது.

இது மத்திய அரசின் ‘விக்சித் பாரத் 2047’ மற்றும் ஆந்திரப் பிரதேச அரசின் ‘ஸ்வர்ண ஆந்திரா’ வளர்ச்சி இலக்குகளுடன் இணைந்த திட்டமாகக் கருதப்படுகிறது.

கல்வி மற்றும் பெண்கள் பாதுகாப்புக்கான புதிய முயற்சிகள்சமூகப் பொறுப்புணர்வின் ஒரு பகுதியாக, ஹீரோ மோட்டோகார்ப் ஆந்திரப் பிரதேச அரசுடன் இணைந்து “டாக்டர் பிரிஜ்மோகன் லால் முஞ்சால் நாளைய நாயகர்கள் கல்வி உதவித்தொகை” திட்டத்தை அறிமுகப்படுத்துகிறது.

இந்தத் திட்டத்தின் மூலம் மாநிலத்தின் 28 மாவட்டங்களில் உள்ள IIIT கல்லூரிகளில் பொறியியல் படிக்கும் தகுதியான மாணவர்களுக்கு முழு கல்விக் கட்டணமும் வழங்கப்படும்.அத்துடன், பெண்களின் பாதுகாப்பு மற்றும் நிலையான போக்குவரத்தை ஊக்குவிக்கும் வகையில், திருப்பதி மாவட்ட பெண் காவலர்களுக்கு VIDA மின்சார ஸ்கூட்டர்கள் வழங்கப்படுவதுடன், சாலைப் பாதுகாப்பு தொடர்பான சிறப்புப் பயிற்சிகளும் அளிக்கப்பட உள்ளன.